Ысык-Көл облусунда Барскоон – Бедел эл аралык автожолунда өлкө тарыхындагы эң ири жана татаал тоннелдердин курулушуна расмий старт берилди.

Өкмөттүн маалыматына ылайык, иш-чарага министрлер Кабинетинин төрагасынын орун басары – Суу ресурстары, айыл чарба жана кайра иштетүү өнөр жайы министри Бакыт Төрөбаев катышты.

Белгилей кетсек, 27-августта Кыргызстан менен Кытайдын мамлекеттик чек арасында жайгашкан «Бедел» көзөмөл өткөрүү пунктуна алып барчу автожолдун курулушуна Президент Садыр Жапаровдун катышуусунда старт берилген.

Курулуп жаткан тоннелдер:

• «Сөөк» ашуусунда – узундугу 5 340 м,
• «Ашуу-Суу» ашуусунда – узундугу 3 840 м.

Бул объекттер Кыргызстандагы эң узун жана техникалык жактан татаал тоннелдер болуп саналат.

Курулуштун мааниси:

• Убакытты үнөмдөйт,
• Жол кыймылынын коопсуздугун арттырат,
• Кыргызстанды аймактык транспорттук-логистикалык түйүн катары чыңдайт.

Долбоор боюнча башка иштер:

• Жолдун жалпы узундугу – болжол менен 150 чакырым,
• Көпүрөлөр, кар көчкүдөн сактоочу галереялар, сел жана таш кулоодон коргоочу тосмолор курулат,
• Жол жүрүүчүлөр үчүн керектүү объекттер каралат.

Учурда:

• 287 адис жана 162 атайын техника тартылган,
• Куруучулар үчүн бардык шарттары бар 4 лагерь салынган.

Бакыт Төрөбаев белгилегендей, курулуш иштери Президент Садыр Жапаровдун түздөн-түз тапшырмасы менен жүргүзүлүп, сапаттын эң жогорку стандарттарына жооп берүүгө тийиш.