17-19-октябрь күндөрү Бишкек шаарынын Турдакун Усубалиев атындагы аянтында «Алтын күз» азык-түлүк жарманкеси өтөт. Бул тууралуу Айыл чарба министрлиги билдирди.

Жарманке Кыргызстандын айыл чарба кызматкерлеринин күнүнө карата уюштурулууда.

Жарманкеде жарандар Кыргызстандын бардык аймактарынан ата-мекендик өндүрүүчүлөрдүн жана дыйкан-фермерлердин табигый, таза, сапаттуу, эң мыкты продукцияларын өз баасында, ортомчусуз сатып алуу мүмкүнчүлүгүнө ээ болушат.

Жарманке текчелерине Ош, Нарын, Ысык-Көл, Жалал-Абад, Талас, Баткен, Чүй дубандарында өндүрүлгөн бардык товарлар коюлат.