КР Суу ресурстары, айыл чарба жана кайра иштетүү өнөр жайы министрлиги аймактардагы суу менен камсыздоо системаларын пайдаланууга болгон мамилени өзгөртүү зарылдыгы тууралуу билдирүү таратты. Айыл калктуу конуштарын таза суу менен камсыздоо боюнча мамлекеттик саясаттын алкагында мекеме министр Эрлист Акунбековдун тапшырмасы менен суу түтүктөрүн масштабдуу куруу жана модернизациялоо иштерин жүргүзүүдө.

Адистердин талдоосуна ылайык, айыл жеринде колдонулуп жаткан тарифтер техникалык тейлөөгө жана инфраструктураны өз убагында оңдоого кеткен чыгымдарды жаппайт. Бул жабдуулардын мөөнөтүнөн мурда иштен чыгуусуна жана суу берүүдөгү үзгүлтүктөргө алып келет. Кырдаалды турукташтыруу үчүн тарифтик торчону жөнгө салуу жана аны кызмат көрсөтүүнүн иш жүзүндөгү өздүк наркына шайкеш келтирүү маселеси каралууда.

Сунушталган механизм калк үчүн суунун жеткиликтүүлүгүн сактоону көздөйт. Белгиленген тариф реалдуу эксплуатациялык чыгымдардан төмөн болгон учурларда, айырма республикалык же жергиликтүү бюджеттен даректүү субсидиялардын эсебинен толукталат. Айрым категориядагы жарандар үчүн жеңилдиктерди киргизүүдө каражаттын тартыштыгын жабуунун ушундай эле тартиби каралган.

Министрлик экономикалык жактан негизделген тарифтерди жана мамлекеттик субсидиялоо механизмдерин айкалыштыруу суу түтүктөрүнүн үзгүлтүксүз иштешине кепилдик берерин баса белгилейт. Техникалык чараларды ишке ашыруу менен катар мекеме калкты ичүүчү сууну өлкөнүн стратегиялык ресурсу катары сарамжалдуу жана аяр пайдаланууга чакырат.