Бүгүн, 30-апрелден тарта Бишкектин Гоголь көчөсүнүн бир бөлүгү унаа кыймылы үчүн убактылуу жабылды. Бул тууралуу шаар мэриясы кабарлады.

Чектөөлөр Гоголь көчөсүнүн Огонбаев көчөсүнөн Фрунзе көчөсүнө чейинки тилкесинде киргизилет. Бул чара аталган аймактагы жылуулук түйүнүн алмаштыруу үчүн жер казуу иштерине байланыштуу.

Буга чейин текшерүүнүн жүрүшүндө Фрунзе көчөсү менен Гоголь көчөсүндөгү №127 турак жайдын ортосундагы 1980-жылы орнотулган жылуулук түйүндөрү техникалык жактан жараксыз абалга келгени аныкталган. Түйүндөрдү жаңылоо иштери аталган көчөгө жаңы асфальт төшөө башталганга чейин аткарылат.

«Бишкекжылуулуктармагы» муниципалдык ишканасы шаар тургундарын жана конокторун жол жүрүү багыттарын алдын ала пландаштырууга чакырат.