Сузак районунда өзгөчө баалуу айыл чарба жерлерин мыйзамсыз пайдалануу жана масштабдуу бузуу фактысы аныкталды. Мамлекетке миллиондогон сом зыян келтирилген. Бул тууралуу КР Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирет.

Мыйзам бузууну Жер жана суу көзөмөлдөө кызматынын борбордук аппаратынын адистери аймактык башкармалык менен биргеликте аныкташкан. Алгач мекеме Сузак райондук мамлекеттик администрациясында пландуу текшерүү жүргүзүп жаткан.

Бирок иштин жүрүшүндө Сузак айылынын кыраакы тургундарынан кайрылуу түшкөн. Алардын даттануусунун негизинде инспекторлор конкреттүү аймакка кошумча пландан тышкары текшерүү уюштурушкан.

Жерине баруунун натыйжасында адистер аянты 5,05 гектарды түзгөн тилкеде кыртыштын күрдүү катмарынын бузулушу фактысын катташты. Белгиленгендей, бул аймак өзгөчө баалуу айыл чарба жерлеринин категориясына кирет.

Ведомствонун алдын ала эсептөөлөрү боюнча, келтирилген зыяндын көлөмү 89 миллион 82 миң сомду түздү.

Учурда бул факт боюнча топтолгон бардык материалдар Кыргыз Республикасынын Башкы прокуратурасына өткөрүлүп берилди. Көзөмөл органы болгон окуяга укуктук баа берип, айыл чарба жерлерин жок кылууга күнөөлүү адамдардын чөйрөсүн аныктоого тийиш.