Өлкө башчы Садыр Жапаров кол койгон жарлыкка ылайык, Орозбеков Адилет Орозбекович Кыргыз Республикасынын Коопсуздук кеңешинин катчысы болуп дайындалды.

Адилет Орозбеков 48 жашта. Ал Кыргызстан эл аралык университетин “Дипломатия жана эл аралык укук” адистиги боюнча аяктаган. Ошондой эле Орусиянын ФКК (ФСБ) Академиясында билим алган. Полковник аскердик наамына жана мамлекеттик жарандык кызматтын 1-класстагы кеңешчиси класстык чинине ээ.

Эмгек жолу:

• 2001–2017-жж. — Улуттук коопсуздук органдарында ыкчам жана жетекчилик кызматтарда иштеген. Анын ичинде УКМКнын конституциялык түзүлүштү коргоо башкармалыгында бөлүм башчынын орун басары, эл аралык кызматташтык бөлүмүнүн башчысы жана Антитеррордук борбордун башкы эксперти болгон.
• 2017–2019-жж. — Пекиндеги Шанхай кызматташтык уюмунун (ШКУ) катчылыгынын референти.
• 2023–2024-жж. — Президенттин Администрациясынын Кырдаалдык борборунун эксперти.
• 2025-жылдын декабрынан тарта — Президенттин жана Министрлер Кабинетинин чечимдеринин аткарылышын контролдоо башкармалыгынын коргоо, укук тартиби жана коопсуздук бөлүмүнүн мамлекеттик инспектору болуп иштеп келген.