Кыргызстандын Улуттук банкы 27-октябрдан тарта 2026-жылдын үлгүсүндөгү 20 жана 50 сом номиналындагы жаңы банкнотторду жүгүртүүгө киргизди. Мекеменин маалыматында, бул акчалар алгачкы жолу Кыргызстандын өзүндө басылып чыгарылды.

Банкноттор «Борбор-Азия Корголгон Басма Басмаканасы» жоопкерчилиги чектелген коому тарабынан даярдалган.

Жаңы үлгүдөгү акчаларда учурдагы бешинчи сериянын дизайны сакталган. Алардын алдыңкы бетинде тарыхый инсандардын портреттери, арткы бетинде тарыхый-маданий имараттар жайгашкан. Банкноттордун өлчөмү жана түсү өзгөртүлгөн жок. Коргоо элементтери эл аралык стандарттарга ылайыкталган.

Улуттук банк жаңы банкноттор расмий төлөм каражаты болуп саналарын жана чыгарылган жылына карабастан өлкө аймагында милдеттүү түрдө кабыл алынарын билдирди.