Ош шаарындагы акча алмаштыруу жайдын ээсин бычактап өлтүрүүгө күнөөлүү деп табылган Өзгөн районунун 38 жаштагы тургуну өмүр бою эркинен ажыратылды. Мындай өкүмдү Ош шаардык соту 28-сентябрда чыгарган. Бул тууралуу Ош облустук сотунун басма сөз кызматы билдирди.

Сот ошондой эле күнөөлүү жарандын мүлкүн конфискациялоо чечимин чыгарган. Учурда соттун өкүмү мыйзамдуу күчүнө кире электиги айтылды

Каргашалуу окуя ушул жылдын 24-майында Ош шаарынын Амир-Темир көчөсүндө болгон. Беткапчан адам акча алмаштыруу жайына кирип, 34 жаштагы ишкерге бычак менен 28 жолу сокку урган. Жабырлануучу алган жаракатынан улам ооруканада көз жумган.

Милиция шектүүнү окуя болгон жерден кармап, андан уурдалган 37 миң 500 сом жана маркумдун эки уюлдук телефондорун алган.