Үстүбүздөгү жылдын апрель айында Кыргызстанга келип түшкөн акча которуулардын жалпы суммасы 259,8 млн АКШ долларын түздү. Бул март айындагы которууларга (255,2 млн доллар) салыштырмалуу 4,6 млн долларга көп.

Улуттук банктын маалыматына ылайык, которулган каражаттардын негизги бөлүгү КМШ өлкөлөрүнөн келген, анын көлөмү 239,8 млн долларды түзөт. Алыскы чет өлкөлөрдөн болсо, болгону 20 млн доллар которулган.

Ошол эле мезгилде Кыргызстандан сыртка чыккан акча которуулардын көлөмү 19,8 млн доллар болгон. Анын ичинен КМШ өлкөлөрүнө 17,7 млн доллар, ал эми алыскы чет өлкөлөргө 2,1 млн доллар жөнөтүлгөн.