Баткен районунун Ак-Татыр айылында сел жүргөндөн кийин өзгөчө кырдаал режими киргизилди. Табият кырсыгы 2-майда нөшөрлөп жааган жамгырдан кийин, саат 19:00 чамасында болгон.

50гө жакын үйдүн короосу суу алдында калды. Кооптуу аймактан 35 үй-бүлө — жалпысынан 149 адам эвакуацияланып, сел жүргөн нуктун жээгинен коопсуз жерге чыгарылды. Учурда жеринде ӨКМ кызматкерлери иштеп жатат, иш-аракеттерди министрдин орун басары Алмазбек Асанов координациялоодо.

Ош — Баткен — Раззаков унаа жолунун 280-чакырымында кыймыл убактылуу токтотулган, азыр жол эки багытта тең ачык.