Binance криптовалюталык биржасы хакердик чабуулдун кесепетинен колдонуучулар тарткан зыяндын 90%ын калыбына келтирди. Бул тууралуу платформа X социалдык тармагында маалымдады.

«BTC, ETH, USDT, BNB, SOL, USDC, XRP, USD1, RLUSD жана ZEC активдери 100% камсыздалды. Бардык токендер боюнча чыгымдарды толук жабуу 100%га жеткенге чейин, биз калган тиешелүү токендерди рыноктук жана биржадан тышкаркы (OTC) каналдар аркылуу сатып алууну улантабыз», — деп айтылат билдирүүдө.

Binance калган 10% ликвиддүүлүгү төмөн токендерге туура келерин, ошондуктан аларды сатып алуу көбүрөөк убакытты алышы мүмкүн экенин кошумчалады. Компания бардык чыгымдарды толугу менен өз мойнуна аларын дагы бир ирет баса белгиледи.

Эске салсак, 29-октябрда Binance’тин мурдагы башкы директору Чанпэн Чжао биржа хакердик чабуулга кабылышы мүмкүн экенин билдирген. Ал эми Binance өзү жаралган көйгөйдөн кабардар экенин жана териштирүү жүргүзүп жатканын кабарлаган.

30-октябрда Binance компаниясынын башкы директору Ричард Тэн бул чабуулга бир нече адамдын тиешеси бар экенин айтты. Ал ошондой эле хакерлер системаны бузуп кирүү учурунда «алдыга жылган сайын колдонулган куралдарды жана издерди тазалап турган өзүн-өзү жок кылуу механизмин» пайдаланышканын белгилеген.

Ошол эле күнү Binance колдонуучулардын жоготууларынын ордун толтуруу үчүн өзүнүн 6,34 миллиард доллардан ашык өздүк каражатын резервге бөлгөнүн маалымдады. Бул сумманын 5 миллиард доллары хакердик чабуулдан жабыркаган криптовалюталарга жайгаштырылган.