Бүгүн Кыргызстан эли Орозо айт майрамын белгилеп жатат. Бишкектин эски аянтында окулган Айт намазына 35 миңдей адам катышты. Бул тууралуу борбор калаанын Ички иштер башкы башкармалыгынын басма сөз кызматы билдирди.
Мусулмандардын орозосунун аякташына байланыштуу майрамдык салтанатка өлкө президенти Садыр Жапаров катышты.
Айт намазы коронавирус пандемиясынан бери биринчи жолу окулду. Намаз окууга мамлекет башчысы, УКМКнын төрагасы Камчыбек Ташиев, Жогорку Кеңештин төрагасы Талант Мамытов, Жогорку соттун төрагасы Замирбек Базарбеков жана башка расмий өкүлдөр, депутаттар менен бирге келишти.
