«Мугалимге болгон урмат-сыйды биз өлкөбүздүн келечегине болгон урмат катары кабыл алышыбыз керек», — деп билдирди президент Садыр Жапаров Билим берүү кызматкерлеринин күнүнө карата.

Мамлекет башчысынын куттуктоосун салтанаттуу иш-чарада Министрлер кабинетинин төрагасы Адылбек Касымалиев окуп берди.

Президент мугалимдик кесип мамлекеттин, коомдун жана келечек муундардын алдындагы эң жооптуу кесиптердин бири экенин, анткени педагогдор көп жагынан өлкөнүн келечегин аныктарын белгиледи.

«Сиздердин көп жылдык тажрыйбаңыздар, билимиңиздер жана турмуштук акылмандыгыңыздар — биздин улуттук байлыгыбыз. Кыргызстандын келечеги — билимдүү жана жоопкерчиликтүү муундун колунда. Ал эми андай муунду тарбиялоо — сиздердин колуңуздарда!» — деп айтылат куттуктоодо.

Жапаров учурда Кыргызстандын билим берүү системасы маанилүү өзгөрүүлөр баскычында турганын белгиледи. Мамлекет билим берүүнүн сапатын жогорулатууга жана балдар үчүн бирдей мүмкүнчүлүктөрдү камсыз кылууга багытталган масштабдуу реформаларды жүргүзүүдө.

Анын айтымында, мектепке чейинки жана мектептик билим берүүгө өзгөчө көңүл бурулууда. Балдар жашаган жерине карабастан, билим алууга бирдей мүмкүнчүлүктөргө ээ болушу керек.

Буга байланыштуу жергиликтүү өз алдынча башкаруу органдары мыйзамда белгиленген тартипте бош турган мамлекеттик жана муниципалдык имараттарды бала бакчаларга ылайыкташтыруу менен алектениши зарыл. Ошондой эле жаңы бала бакчаларды куруу жана бул тармакта мамлекеттик-жеке өнөктөштүктү кеңейтүү каралууда.

Жапаров 12 жылдык билим берүү системасына өтүүнү реформанын негизги багыттарынын бири катары атады. Анын айтымында, кеп окуу мөөнөтүн узартууда гана эмес, билим берүүнүн мазмунун, окуу программаларын, стандарттарды, окутуу усулдарын жана педагогикалык кадрларды даярдоо тутумун түп-тамырынан бери өзгөртүүдө турат.

«Замандын талабына ылайык, биз жөн гана жаттоого негизделген системадан баланы өз алдынча ой жүгүртүүгө, командада иштөөгө жана жоопкерчиликтүү чечимдерди кабыл алууга үйрөтүүчү системага өтүшүбүз керек», — деп айтылат куттуктоодо.

Президент тез өзгөрүп жаткан заманда балдарды санариптик технологияларды колдонууга, өз алдынча изилдөө жүргүзүүгө даярдоо, ошондой эле аларга өз өлкөсү, улуттук баалуулуктары жана маданияты жөнүндө терең билим берүү керектигин баса белгиледи.

Реформанын алкагында мамлекеттик билим берүү стандарттары, окуу программалары жана окуу китептери жаңыланууда. Мектептерде STEM-багыттары өнүктүрүлүп, санариптик куралдар жана заманбап окутуу ыкмалары киргизилүүдө.

Ошондой эле жасалма интеллект, программалоо, дизайн, спорттук дрондорду башкаруу жана робототехника боюнча ийримдер түзүлүүдө. Экологиялык жана туристтик багыттар, ошондой эле улуттук баалуулуктарга байланыштуу долбоорлор өнүгүүдө.

Жаңы окуу жылында Кыргызстандын 500 мектебинде шахмат ийримдери ачылды. Мындан тышкары, өлкөнүн 53 мектебинде балдарга программалоону, робототехниканы жана заманбап технологияларды үйрөтө турган IT-Кванториумдарды ачуу пландалууда.

Быйыл дагы 220 мектепти STEM-лабораториялар менен жабдуу башталат.

Куттуктоодо ошондой эле «Алтын казык» программасын сапаттуу ишке ашыруунун маанилүүлүгү белгиленди. Ал туруктуу өнүгүүгө, жоопкерчиликке жана инновацияларга багытталган жаңы билим берүү маданиятын калыптандыруунун негизи болушу керек.

Бийлик кесиптик билим берүүнү өнүктүрүүгө да өзгөчө көңүл бурууга ниеттенүүдө.

Сөзүнүн соңунда Жапаров педагогдорго талыкпас эмгеги, сабырдуулугу жана балдарга жасаган камкор мамилеси үчүн ыраазычылык билдирди.

«Сиздерге талыкпас эмгегиңиздер, чыдамкайлыгыңыздар жана балдарга болгон мээримиңиздер үчүн чын жүрөктөн ыраазычылык билдирем. Баарыңыздарга бекем ден соолук, үй-бүлөлүк бакыт жана педагогикалык чыгармачылыкта жаңы ийгиликтерди каалайм!» — деп айтылат куттуктоодо.