7-ноябрда Бишкек шаарында Кыргыз мамлекеттик медициналык академиясынын 21 жаштагы студентинин сөөгү табылды. Бул тууралуу Биринчи май райондук милициясы билдирди.

Маалыматка ылайык, каза тапкан Б.И. 28-октябрында үйдөн чыгып кеткен бойдон дайынсыз жоголуп, изделип жаткан.

Маркумдун сөөгүн алгачкы кароонун жүрүшүндө жаракаттын издери табылган эмес. Анын жанынан таблетка түрүндөгү дары-дармектер жана чоң атасына жазылган кат табылган.

Өлүмдүн себебин тактоо үчүн соттук-медициналык экспертиза дайындалган. Учурда окуянын жагдайларын аныктоо боюнча тергөө амалдары жүргүзүлүп жатканы айтылды.