Бишкек шаарында көчөдө кызды курал менен коркутканга шектелип 37 жаштагы эркек киши кармалды. Бул тууралуу Ленин райондук ички иштер башкармалыгынын басма сөз кызматы билдирди.

Маалыматка ылайык, 29-октябрда саат 10:25 чамасында «102» кызматына Чыңгыз Айтматов проспектиси менен Горький көчөсүнүн кесилишинде автоунаада отурган адам кызга сөгүнгөн сөздөрдү айтып, куралга окшош нерсе менен коркутуп жаткандыгы тууралуу билдирүү түшкөн.

Милиция кызматкерлери жүргүзгөн иш-чаралардын негизинде шектүү аныкталып, Ленин РИИБинин тергөө кызматына жеткирилди.

Аталган факт боюнча Кылмыш-жаза кодексинин «Бейбаштык» беренеси менен кылмыш иши козголгон. Текшерүү учурунда аталган курал алынып, автоунаа айып короосуна токтотулган. Учурда соттук экспертизалар дайындалып, тергөө амалдары уланып жатканы айтылды.