Бишкек шаарында мечитте уурулук кылууга шектелип, 18 жаштагы жигит кармалды. Бул тууралуу Бишкек ШИИБ билдирди.

Бишкек ШИИБдин маалыматында, 7-январда жаран милицияга кайрылып, ошол эле күнү саат 16:30 чамасында Дордой базары жактагы мечитте ал намаз окуп жаткан учурда капчыгы, «iPhone» телефону жана жеке буюмдары уурдалганын билдирген.

Бул факт боюнча Кылмыш-жаза кодексинин “Уурулук” беренеси менен иш козголгон. Ыкчам издөөнн натыйжасында 18 жаштагы А.С. кармалды. Милиция шектүү мурда бир нече жолу кылмыш жоопкерчилигине тартылганын билдирди.

Тергөөдө шектүү уурдалган телефонду Ош базарында 3 миң сомго сатып жибергенин мойнуна алган. Учурда тергөө уланууда.