30-январда белгилүү америкалык жана канадалык актриса Кэтрин О’Хара Лос-Анжелестеги үйүндө көпкө созулбаган оорудан кийин 71 жашында дүйнө салды. Бул тууралуу анын менеджери ырастаганын Variety басылмасы жазып чыкты.

Кэтрин О’Хара дүйнөлүк коомчулукка «Үйдө жалгыз» (Home Alone) комедиясында башкы каарман Кевиндин апасынын ролу менен таанылган. Ошондой эле ал карьерасынын акыркы жылдарында «Шиттс Крик» (Schitt’s Creek) сериалындагы ролу менен ийгиликке жетишкен.

Актриса карьерасын 1970-жылдардын ортосунда Канадада баштаган. Ал актрисалык менен бирге сценаристтик иш менен да алектенген. 1982-жылы өзүнүн алгачкы «Эмми» сыйлыгын сценарий жазгандыгы үчүн алган. О’Хара жалпысынан эки жолу «Эмми» сыйлыгына татыган.