.svg){kind=logo}
Бишкекте Шакиранын концертине карата Bishkek Arena стадионунда сахна курула баштады — видео
Бишкектеги Bishkek Arena стадионунда дүйнөгө белгилүү колумбиялык ырчы Шакиранын концерти үчүн сахнаны куруу иштери башталды.
Учурда адистер сахналык конструкцияларды орнотуп, алдыдагы шоуга аянтчаны даярдоо боюнча техникалык иштерди жүргүзүп жатышат.
Уюштуруучулардын маалыматына караганда, Шакиранын концертине билеттерди дүйнөнүн 28 өлкөсүнүн жарандары сатып алышты. Бул концерт Кыргызстанга жергиликтүү көрүүчүлөрдү гана эмес, ырчынын чет өлкөлүк күйөрмандарын да тартары күтүлүүдө.
Алдыдагы концерт Шакиранын Борбордук Азиядагы алгачкы концерти катары жарыяланууда.
Билеттерди сатуу расмий платформалар аркылуу жүрүп жатат:
- GovTicket — https://ticket.gov.kg
- TicketKG — https://ticket.kg
- KassirKG — https://kassir.kg
Мындан тышкары, билеттер казакстандык билет операторлору аркылуу да жеткиликтүү.
Кыргызстан менен Казакстандын туркомпаниялары менен биргеликте чет элдик көрүүчүлөр үчүн даяр туристтик топтомдорду сатуу уюштурулган. Алардын наркына концертке билет, трансфер жана жатакана кирет.
Уюштуруучулар билеттерди сатып алууда коопсуздук чараларын сактоо зарылдыгына өзгөчө көңүл бурушат. Көрүүчүлөргө бир гана расмий платформаларды жана текшерилген операторлордун кызматтарын колдонуу сунушталат.
Алдамчылык коркунучу бар болгондуктан, социалдык тармактар, жеке билдирүүлөр жана белгисиз ортомчулар аркылуу билет сатып алуу сунушталбайт.
Эскерте кетсек, Шакиранын концерти 18-октябрда өтөт. Дүйнөлүк жылдыздын өнөр көрсөтүүсүнө он күн калды.
