Кыргыз геология кызматы жана «Чаарат ЗААВ» ЖАКы Жалал-Абад облусундагы Чаарат кенин өздөштүрүү боюнча долбоорду ишке ашырууну талкуулашты. Тараптар долбоорду ишке ашырууну тездетүү үчүн биргелешкен ишти улантууну макулдашышты.

Жаратылыш ресурстары, экология жана техникалык көзөмөл министрлигине караштуу Кыргыз геология кызматында «Чаарат ЗААВ» ЖАКтын өкүлдөрү менен жумушчу жолугушуу болуп өттү.

Компания Жалал-Абад облусунун Чаткал районунда жайгашкан Чаарат кенин өздөштүрүү долбоорунун жүрүшү тууралуу маалымат берип, ошондой эле мамлекеттик органдардын көмөгү талап кылынган маселелерди белгиледи.

Жолугушуунун жыйынтыгында Кыргыз геология кызматы өз ыйгарым укуктарынын чегинде долбоорду андан ары ишке ашыруу үчүн зарыл болгон колдоолорду көрсөтүүгө даяр экенин билдирди.

Тараптар кенди өздөштүрүүнү жандандыруу үчүн зарыл болгон конкреттүү чараларды аныктоо боюнча биргелешкен ишти улантууну макулдашышты.

«Чаарат» долбоору аймак үчүн маанилүү долбоорлордун бири катары каралууда. Аны ишке ашыруу инвестицияларды тартууга, жаңы жумуш орундарын түзүүгө, салыктык түшүүлөрдү көбөйтүүгө мүмкүндүк берет жана Чаткал районунун, ошондой эле Жалал-Абад облусунун социалдык-экономикалык өнүгүүсүнө өбөлгө түзөрү күтүлүүдө.