Борбордук шайлоо комиссиясы президенттикке талапкерлерди колдоо үчүн кол топтоо тартибин дагы бир жолу түшүндүрдү. Талапкер катары катталуу үчүн кеминде 30 миң шайлоочунун колун чогултуу зарыл. Бул талап «Президентти жана Жогорку Кеңештин депутаттарын шайлоо жөнүндө» конституциялык мыйзамдын 52-беренесинде белгиленген.

Колдорду добуш берүү укугуна ээ жарандардын арасында электрондук түрдө, булуттуу электрондук санарип кол тамгасынын жардамы менен же кагаз түрүндөгү кол коюу баракчалары аркылуу чогултууга болот. Кол коюу баракчасынын формасын, ошондой эле кол топтоо жана аларды текшерүү тартибин БШК аныктайт.

БШК 2026-жылдын 23-сентябрында кабыл алган кол топтоо жөнүндө жобого ылайык, колдор «Кол топтоо» автоматташтырылган системасы аркылуу электрондук түрдө чогултулат. Система «Түндүк» мамлекеттик электрондук кызмат көрсөтүүлөр порталында иштейт.

Талапкердин ыйгарым укуктуу өкүлдөрү чогултулган колдор тууралуу маалыматты көрүп, кол коюу баракчаларын түзө алышат. Ошондой эле талапкерди колдогон шайлоочулар тууралуу маалыматтар — алардын жеке маалыматтары, жаш курагы жана аймактар боюнча статистика жеткиликтүү болот. Системада катталган колдордун жалпы тизмеси да бар. Анда ар бир колдун катар номери, шайлоочунун фамилиясы, аты, аймагы жана колу тастыкталган дата көрсөтүлөт.

«Кызмат» мамлекеттик мекемесинин маалыматына караганда, «Түндүк» порталынын колдонуучуларынын саны 3 млн 600 миңден ашты.