«Ош-Тазалыктын» муниципалдык ишканасынын директору Нургазы Акматов кызматтан кетүү тууралуу арыз жазды. Бул тууралуу Ош шаарынын мэри билдирди.

Мэрдин айтымында, Акматов кызматта болгону бир ай иштеген. Ал кызматтан кетүү себебин көчөдөгү иштерге, эртең мененки рейддерге чыгууга жана узак басууга көнбөгөнү менен түшүндүргөн.

«Иштебейм, чарчадым, эртең мененден кечке баса албайм деди. Буттарым ооруп, бутум жарылып кетти деп айтты. Кеңседе досу менен отуруп алып, жумшак шартка көнүп калган экен. Биз көчөдөгү адамдарбыз, ал болсо офистин кишиси», — деди мэр.

Акматовдун ордуна ким келери тууралуу маалымат азырынча айтыла элек. «Ош-Тазалык» шаардагы тазалык иштерин уюштуруп, көчөлөрдү, коомдук жайларды жана таштанды ташуучу системаны тейлейт.