БУУнун башкы катчысы Антониу Гутерриш өлкөнүн Эгемендүүлүк күнүндө Кыргызстанга келип, мамлекеттин БУУнун ишмердигинде жана эл аралык коомчулуктун турмушунда ойногон маанилүү ролун белгиледи.

Гутерриш Кыргызстан БУУнун Коопсуздук Кеңешинин курамына 2027–2028-жылдарга алгачкы ирет шайланганын эске салды. Анын айтымында, өлкө тынчтыкты, коопсуздукту жана өнүгүүнү камсыз кылуу боюнча эл аралык аракеттердин борборунда болот, бул бүгүнкү күндө Кыргызстанда байкалып жаткан таасирдүү экономикалык өсүшкө толук шайкеш келет. Кыргызстан Коопсуздук Кеңешине туруктуу эмес мүчө болуп шайланган Борбор Азиядагы экинчи мамлекет болуп калды — биринчи жолу 2017–2018-жылдары аталган кеңешке Казакстан кирген.

Бишкекте Гутерриш бир катар эки тараптуу жолугушууларды, анын ичинде Кыргызстандын президенти Садыр Жапаров менен сүйлөшүүлөрдү өткөрдү — тараптар аймактагы кырдаалды, климаттын өзгөрүшү, айлана-чөйрөнү коргоо жана социалдык-экономикалык өнүгүү багыттарындагы БУУ менен Кыргыз Республикасынын кызматташтыгын, ошондой эле өлкөнүн Коопсуздук Кеңешиндеги алдыдагы мүчөлүгүнө байланыштуу тынчтык жана коопсуздук маселелерин талкуулашты.

Башкы катчы ошондой эле Өзбекстандын президенти Шавкат Мирзиёев менен жолугушуп, өлкөнүн Борбор Азиядагы тынчтык менен туруктуулукка өбөлгө түзгөн дипломатиялык демилгелерин белгиледи. Тажикстандын президенти Эмомали Рахмон менен болгон жолугушууда Гутерриш ага суу ресурстары жана мөңгүлөр жаатындагы глобалдык күн тартибин колдогондугу үчүн ыраазычылык билдирди — тараптар аймактагы кырдаалды, анын ичинде Ооганстандагы окуяларды талкуулашты.

Мындан тышкары, дүйшөмбү күнү БУУнун жетекчиси этникалык спорт түрлөрү боюнча эң ири эл аралык мелдеш болгон VI Дүйнөлүк көчмөндөр оюндарынын ачылыш аземине катышты. Аталган оюндарда жүздөн ашуун өлкөнүн өкүлдөрү салттуу спорт түрлөрүн, кол өнөрчүлүгүн жана музыкасын тартуулашат. 2021-жылы Оюндар ЮНЕСКОнун материалдык эмес маданий мурастарынын репрезентативдик тизмесине киргизилген.