Кыргызстанда жугуштуу эмес жана онкологиялык ооруларды аныктоо, дарылоо жана шашылыш медициналык жардам көрсөтүү боюнча 60тан ашык алгоритм иштелип чыкты. Бул тууралуу Саламаттык сактоо министрлиги билдирди.

Маалыматка ылайык, бул стандарттар жүрөк-кан тамыр ооруларын, бөйрөк патологияларын, сепсистик жана шоктук абалдарды, ошондой эле онкологиялык илдеттерди камтыйт. Ошондой эле стандарттык операциялык жол-жоболор, (СОЖ), жол карталары киргизилип, бейтаптарды так багыттоо механизмдери түзүлүп жатканы айтылды.

Аталган эрежелерди түшүндүрүү максатында 10–12-ноябрь күндөрү Бишкек шаарында улуттук борборлордун, стационарлардын, борбор калаанын жана Чүй облусунун үй-бүлөлүк медицина борборлорунун адистери үчүн окутуулар өтүүдө. Ал эми Ош, Баткен, Жалал-Абад, Ысык-Көл, Нарын жана Талас облустарынын медицина кызматкерлери үчүн окуу онлайн уюштурулган.

Министрлик бул иш-чаралар бейтаптарга жашаган жерине жана мекеменин деңгээлине карабастан медициналык жардам көрсөтүүнү камсыз кылууга, өлүм жана майыптык тобокелдиктерин азайтууга багытталганын билдирди.