5-7-февраль күндөрү күтүлүп жаткан жаан-чачынга байланыштуу, Кыргызстандын тоолуу райондорунда жана ашууларда кар көчкү түшүшү мүмкүн.

ӨКМнын маалыматында кар көчкү түшүүсү күтүлөт:

• Бишкек — Ош унаа жолунун 198-255-чакырымдарында Ала-Бел ашуусу, Чычкан капчыгайы;
• Ала-Бука — Каныш-Кыя унаа жолунун 65-101-чакырымдарында Чапчыма ашуусу;
• Красная-Горка — Ак-Таш унаа жолунун 0-3-чакырымдарында;
• Мырза-Аке — Кара-Кулжа — Алайкуу унаа жолунун 65-110-чакырымдарында;
• Каракол — Эңилчек унаа жолунун 45-90-чакырымдарында Чоң-Ашуу ашуусунда.

Тоолуу тилкелерде кар күрткүсү күтүлүп, жолдор тайгак болуп муз тоңот. Унаалардын ортосундагы 500 метр аралык кыймыл чектелиши зарыл.

Эске салсак, 31-январда Кара-Кулжа районунун “Жүлгүр” жайлоосунда 37 жаштагы киши кар көчкүнүн астында калып, анын сөөгү 3-февралда табылды. Жаран жайлоого тааныштары менен мергенчиликке чыккан.