Кыргыз балбаны Чынарбек Изабеков ардагерлер арасындагы күрөш боюнча дүйнө чемпиону аталды. Бул тууралуу UWW (United World Wrestling) расмий сайты маалымдады.

Маалыматка ылайык, Изабеков 100 килограммга чейинки D категориясында финалдык беттеште америкалык Элвин Риггсти 6:2 эсебинде утуп, алтын медалга ээ болду.

Мындан мурда кыргызстандык башка спортчулар да ийгилик көрсөтүштү:

• Эсенбек Байматов (78 кг) жана Роман Сарыбаев (88 кг) — күмүш медаль ээси болушту;
• Аскер Эфендиев (130 кг) жана Таалайбек Джанаев (88 кг) — коло байге алышты.

Ардагерлер арасындагы дүйнө чемпионаты учурда Венгриянын Татабанья шаарында өтүп жатат жана 12-октябрда жыйынтыкталат.