Кыргызстанда 2026-жылдын 22-октябрынан тартып калкка сатылуучу көмүрдүн баасына 90 күнгө мамлекеттик жөнгө салуу киргизилди. Бул тууралуу Reporter.kg басылмасына Монополияга каршы жөнгө салуу кызматы тастыктады.

Тиешелүү чечим Экономика жана коммерция министрлигинин 21-октябрдагы № 219 буйругу менен бекитилген. Рыноктогу кырдаалга жараша жөнгө салуу мөөнөтү узартылышы мүмкүн.

Жакынкы убакта кызматтын аймактык бөлүмдөрү калкка сатылуучу көмүрдүн чекене баасынын жогорку чегин белгилейт. Баалар ар бир облус үчүн, ошондой эле Бишкек жана Ош шаарлары үчүн өзүнчө аныкталат.

Кызматтын кызматкерлери белгиленген баалардын сакталышын көзөмөлдөйт. Бааны негизсиз көтөргөн жеке жактарга 3 миң сом, юридикалык жактарга 13 миң сом айып пул салынат. Ошондой эле отун базаларында жана көмүр сатуу жайларында текшерүүдөн өткөн таразалардын жана баасы көрсөтүлгөн баа белгилеринин бар-жогу текшерилет.

Кызматтын маалыматына ылайык, бул чаралар жылытуу мезгилинде баалардын негизсиз өсүшүнө жол бербөө, калкты жеткиликтүү көмүр менен камсыз кылуу, керектөөчүлөрдүн укуктарын коргоо жана отун рыногун турукташтыруу максатында киргизилди.