АКШнын президенти Дональд Трамп Куба өкмөтүнүн саясаты жана аракеттери өлкөнүн улуттук коопсуздугуна жана тышкы саясатына «өзгөчө коркунуч» келтирет деп таап, федералдык деңгээлде өзгөчө абал режимин киргизди. Тиешелүү жарлык Ак үйдүн расмий сайтында жарыяланды.

Жарлыкта Кубанын саясаты АКШнын кызыкчылыктарына каршы келген мамлекеттер жана топтор менен кызматташып жатканы айтылат. Негизги себептер катары төмөнкүлөр көрсөтүлдү:

• Аскердик жана чалгындоо кызматташтыгы: Куба өз аймагында АКШга каршы багытталган Орусиянын чалгындоо объекттерин жана Кытайдын аскердик түзүмдөрүн жайгаштырууга шарт түзүп берген.
• Террордук топторду колдоо: Куба өкмөтү ХАМАС жана Хезболла сыяктуу террордук топтордун аймактагы ишмердүүлүгүнө жана экономикалык байланыштарын чыңдоосуна көмөктөшүүдө.
• Аймактык дестабилизация: Куба режими миграциялык процесстерди жана зомбулукту колдонуу менен Батыш жарым шарындагы туруктуулукту бузууга аракет кылууда. Ошондой эле өлкө ичинде адам укуктарын бузуу, саясий куугунтук жана эркин басма сөздү чектөө фактылары айтылган.

Мындан улам АКШ Кубага экономикалык басым көрсөтүү үчүн жаңы тарифтик система киргизет. Тактап айтканда, Кубага түз же кыйыр түрдө мунай саткан же жеткирген бардык мамлекеттерге карата экономикалык санкциялар колдонулат. Ошондой эле андай өлкөлөрдөн АКШга импорттолгон товарларга кошумча бажы алымдары салынат.