Кыргызстандын азыркы президенти Садыр Жапаров маалымат жарыяланган учурга карата алдыдагы президенттик шайлоодо өз талапкерлигин колдоо үчүн шайлоочулардын 54 157 кол тамгасын топтоду.

Мындай маалымат талапкерлерди колдоо үчүн кол тамгаларды электрондук түрдө чогултууга арналган мамлекеттик автоматташтырылган маалыматтык тутумда (АМТ / АИС) жарыяланды.

Эске салсак, Садыр Жапаров мамлекет башчылык кызматка өз талапкерлигин көрсөтүү боюнча арызын 10-ноябрда тапшырган.

11-ноябрга карата Борбордук шайлоо комиссиясына президенттик кызматка талапкерлерден жети арыз келип түшкөн.

Электрондук системанын маалыматына ылайык, калган талапкерлер төмөнкүдөй сандагы кол тамгаларды чогултушту:

• Сыймык Жапыкеев — 19 379;
• Аймен Касенов — 16 347;
• Исхак Масалиев — 11 763;
• Азамат Эсенбеков — 8 846;
• Акай Кыдыров — 5 370.

Ошентип, учурда Садыр Жапаров чогултулган кол тамгалардын саны боюнча алдыда келе жатат.

Кол тамгаларды чогултуу боюнча электрондук системанын маалыматына ылайык, материал жарыяланган учурга карата Кыргызстандын президенттигине талапкерлерди колдоп 115 772 шайлоочу кол койгон. Алардын ичинен 78 238и — эркектер (68%) жана 37 534ү — аялдар (32%).

Эң активдүү болуп 19 жаштан 35 жашка чейинки жарандар чыкты — 68 688 адам. Ал эми 36–45 жаш курагындагыларга 22 691 кол тамга туура келет.

46 жаштан 55 жашка чейинки шайлоочулардын арасынан 10 484 адам кол койсо, 56 жаштан 65 жашка чейинкилерден — 6 488, ал эми 66 жаш жана андан улуу курактагылардан — 2 819 адам катталган. 18 жаштагы жаштардын арасында 4 166 кол тамга катталган.

Ошентип, кол тамга чогултууга катышкандардын басымдуу бөлүгүн 19 жаштан 45 жашка чейинки жарандар түзүүдө.

Кыргызстандын президенттигине талапкерлерди көрсөтүү 13-ноябрга чейин уланат.

Президенттик шайлоо 2027-жылдын 27-январына белгиленген.

Анара Мамытова