Бишкек жана Аламүдүн району боюнча Экологиялык жана техникалык көзөмөл кызматынын аймактык башкармалыгы З. Гареев атындагы Ботаникалык бактын администрациясына тиричилик жана курулуш калдыктарын топтогону үчүн 17 миң сом айып пул салды. Бул тууралуу Жаратылыш ресурстары, экология жана техникалык көзөмөл министрлиги маалымдады.

Текшерүүнүн жүрүшүндө калдыктар атайын белгиленбеген жерге топтолгону аныкталган. Бул аймактын санитардык жана экологиялык абалына терс таасирин тийгизген. Бул факты боюнча протокол түзүлгөн.

Айып пулдан тышкары, ботаникалык бактын администрациясына аймакты талаптагыдай санитардык абалга келтирүү жана аныкталган мыйзам бузууларды жоюу боюнча көрсөтмө берилди.