Аламүдүн райондук соту Илим министрлигинин мурдагы башчысы Бактияр Орозовго карата чечим чыгарды. Экс-чиновник транспорт каражатын алкоголдук мас абалында башкарганы үчүн күнөөлүү деп табылып, бир жыл мөөнөткө айдоочулук укугунан ажыратылды.

Соттук териштирүүгө жана кызматтан алынууга себеп болгон окуя 15-декабрга караган түнү болгон. Орозов Чүй облусунун Кой-Таш айылы тараптан милиция кызматкерлери тарабынан кармалган. Медициналык күбөлөндүрүү мас абалында унаа башкаруу фактысын тастыктаган.

Эске салсак, 15-декабрда президент Садыр Жапаров Бактияр Орозовду ээлеген кызматынан бошотуу жөнүндө жарлыкка кол койгон. Жумуштан алуунун расмий себеби катары «мамлекеттик кызматкердин этикасын сактабагандыгы» көрсөтүлгөн.