Кыргызстандын президенти Садыр Жапаров 12-ноябрда Борбор Азия өлкөлөрүнүн жана Кытайдын курулуш министрлерин кабыл алды. Жолугушуу «Борбор Азия — Кытай» форматынын алкагында өттү. Бул тууралуу мамлекет башчысынын басма сөз кызматы билдирди.

Президент акыркы жылдары Борбор Азия өлкөлөрү менен Кытайдын ортосундагы кызматташтык жигердешип, жаңы багыттарды камтыганын белгиледи.

Анын айтымында, Борбор Азия мамлекеттери менен Кытайдын ортосундагы Түбөлүк ынак коңшулук, достук жана кызматташтык жөнүндө келишимге кол коюлушу өзгөчө мааниге ээ. Бул документ узак мөөнөттүү мамилелерди өнүктүрүүгө жана биргелешкен демилгелерди ишке ашырууга негиз түзөт.

Жапаров ошондой эле Сиань жана Астана шаарларында өткөн «Борбор Азия — Кытай» форматындагы эки саммитти эске салды. Анын айтымында, Катчылыктын иши жана келерки жылы Кытайда өтүүчү үчүнчү саммитке даярдык өлкөлөр ортосундагы кызматташтыктын кеңейип жатканын күбөлөндүрөт.

Мамлекет башчысы курулуш тармагында өз ара аракеттенүүнүн, анын ичинде тажрыйба алмашуунун, жаңы ыкмаларды киргизүүнүн жана актуалдуу милдеттерди биргелешип чечүүнүн маанилүүлүгүн баса белгиледи.

Жолугушуунун жүрүшүндө Жапаров Кыргызстандын курулуш тармагынын өнүгүшү жана «Менин үйүм» мамлекеттик турак жай программасынын ишке ашырылышы тууралуу айтып берди.

Анын айтымында, программанын алкагында бүткүл өлкө боюнча жеткиликтүү турак жайлар салынып, турак жай инфраструктурасы өнүгүп жана ипотекалык насыялоонун жеткиликтүүлүгү жогорулоодо.

Президент Кыргызстан Борбор Азия өлкөлөрүнүн жана Кытайдын тармактык министрликтери менен кызматташтыкты кеңейтүүгө, ошондой эле ири биргелешкен долбоорлорду ишке ашырууга кызыкдар экенин белгиледи.

Ал курулуш министрлеринин жолугушуусунда жетишилген макулдашуулар мамлекеттер ортосундагы практикалык кызматташууну чыңдоого мүмкүндүк берет деген ишенимин билдирди.

«Борбор Азия — Кытай» форматынын Катчылыгынын башкы катчысы Сунь Вэйдун кыргыз тарапка курулуш министрлеринин экинчи жолугушуусун уюштургандыгы үчүн ыраазычылык билдирди.

Ал курулуш мекемелеринин жетекчилеринин кеңешмеси «Борбор Азия — Кытай» форматынын алкагында иштеп жаткан ведомстволор аралык өз ара аракеттенүүнүн 14 механизминин бири экенин маалымдады.

Сунь Вэйдундун айтымында, курулуш чөйрөсүндөгү кызматташтык бул тармактын өзүн гана эмес, мамлекеттер ортосундагы экономикалык, соода жана гуманитардык байланыштарды өнүктүрүүгө да өбөлгө түзөт.

Ал ошондой эле кызматташууну кеңейтүү заманбап технологияларды киргизүүгө жана катышуучу өлкөлөрдө эмгек өндүрүмдүүлүгүн жогорулатууга мүмкүндүк берерин белгиледи.

Башкы катчы министрлердин жолугушуусунун жыйынтыктары мурдагы саммиттерде мамлекет башчылары тарабынан жетишилген макулдашууларды ишке ашырууда маанилүү кадам болорун баса белгиледи.

Жаңы демилгелер жана жетишилген макулдашуулар 2027-жылы Кытайда өтө турган үчүнчү «Борбор Азия — Кытай» саммитинин алдында кызматташтыкты мындан ары өнүктүрүүгө салым кошот деп күтүлүүдө.