Кечээ, 21-майда, кечки саат 22:45 чамасында Кант шаарындагы Куренкеев жана Ленин көчөлөрүнүн кесилишинде жол кырсыгы болуп, бир адам каза тапты. Бул тууралуу Чүй облустук милициясы кабарлады.

Маалыматка ылайык, 29 жаштагы А.А. аттуу айдоочу «Mercedes-Benz S-Class» үлгүсүндөгү унаа менен бара жатып башкарууну жоготкон. Натыйжада унаа жол чырактан түз өтүп кетип, имаратты сүзгөн. Кагылышуудан кийин унаа өрттөнүп кеткен.

Кырсыктын кесепетинен 28 жаштагы К.Ф. окуя болгон жерде каза болгон. Унаанын айдоочусу, ошондой эле 29 жана 22 жаштагы эки жүргүнчү ар кандай жаракат алып, Кант шаардык аймактык ооруканасына жеткирилген.

Учурда тиешелүү экспертизалар дайындалып, текшерүү иштери жүргүзүлүп жатканы айтылды.