Кыргызстан, Казакстан жана Өзбекстандын ортосунда аймактагы суу-энергетикалык балансты жөнгө салган бир катар протоколдорго кол коюлду. Бул тууралуу Казакстандын Энергетика министрлиги билдирди.

Маалыматка ылайык, аталган документтерге Чолпон-Ата шаарында үч өлкөнүн энергетика жана суу чарба органдарынын үч тараптуу жолугушуусунун жыйынтыгында кол коюлган.

Негизги документте Токтогул суу сактагычынан суу агызууну камсыз кылуу жана анын ордуна Кыргызстанга Казакстан менен Өзбекстандан электр энергиясын жеткирүү каралган.

Ошондой эле Орусиядан Кыргызстанга Казакстан аркылуу электр энергиясын транзит аркылуу жеткирүүнүн шарттары макулдашылган.