КР Саламаттыкты сактоо министрлиги жана КЭРдин Саламаттыкты сактоо боюнча мамлекеттик комитети «Ак ниет саякат» («Добросердечное путешествие») долбоорун ишке ашыруу жөнүндө макулдашууга кол коюшту. Документ Кыргызстандын аймагында тубаса жүрөк кемтиги бар балдарга жогорку технологиялык медициналык жардам көрсөтүүнү карайт.

Макулдашууга кол коюу аземи Бээжинде министрдин орун басары Бакытбек Кадыралиев баштаган кыргыз делегациясынын сапарынын алкагында өттү. Долбоор эң татаал операцияларды жасоого гана эмес, эки өлкөнүн клиникаларынын ортосундагы кесиптик өз ара аракеттенүүнү өнүктүрүүгө, анын ичинде дарылоонун инновациялык ыкмаларын киргизүүгө жана ата мекендик адистердин квалификациясын жогорулатууга багытталган.

Сапардын жүрүшүндө делегация Кытайдын алдыңкы медициналык борборлору болгон — Фувай (Фувэй) жана Тяньтань (Тянь-Тань) ооруканаларын кыдырды. Тараптар кардио- жана нейрохирургия тармагында тажрыйба алмашуу, ошондой эле биргелешкен илимий изилдөөлөрдү жүргүзүү тууралуу макулдашышты. Бул демилгени ишке ашыруу гуманитардык саламаттыкты сактоо тармагында Кыргызстан менен КЭРдин ортосундагы стратегиялык өнөктөштүктү чыңдоодогу маанилүү кадам болуп калат.