Кыргызстандын Башкы прокуратурасынын, Ички иштер министрлигинин жана Улуттук банктын өкүлдөрүнөн турган ведомстволор аралык делегация Өзбекстандын тиешелүү мамлекеттик органдары менен жолугушууларды өткөрдү. Тараптар укук коргоо органдарын санариптештирүү жана интернет-алдамчылыкка каршы күрөшүү боюнча тажрыйба алмашты.

Жолугушууларда прокурордук көзөмөлдү автоматташтыруу, кылмыш сот өндүрүшүн электрондук форматта жүргүзүү, санариптик далилдер менен иштөө, мамлекеттик маалыматтык системалар менен маалымат базаларын интеграциялоо маселелери талкууланды.

Интернет-алдамчылыкка каршы күрөшүүгө өзгөчө көңүл бурулду. Анын ичинде шектүү финансылык операцияларды ыкчам аныктоо жана бөгөт коюу үчүн антифрод-системаларды колдонуу, банктардын укук коргоо органдары менен өз ара аракеттенүүсү каралды.

Башкы прокуратурада белгилешкендей, тажрыйба алмашуу укук коргоо органдарынын ишин өркүндөтүүгө, интернет-алдамчылыктын алдын алууга жана жарандардын укуктарын коргоону күчөтүүгө багытталган.