Кыргызстандын мектептеринде 2026–2027-окуу жылына карата каникулдардын графиги бекитилди. Ал Агартуу министрлигинин базистик окуу планына ылайык аныкталганын ведомстводон билдиришти.

Алдыдагы каникул — күзгү эс алуу. Ал 2026-жылдын 11-ноябрынан 15-ноябрына чейин беш календардык күнгө созулат. Сабактар 16-ноябрда кайра башталат.

Кышкы каникул 2027-жылдын 1-январынан 10-январына чейин он календардык күнгө созулат. Сабактар 11-январда башталат. Жазгы каникул 2027-жылдын 3-мартынан 8-мартына чейин алты календардык күнгө созулуп, окуучулар 9-мартта кайра сабакка киришет. Май майрамдарына карата каникул 2027-жылдын 1-майынан 9-майына чейин тогуз календардык күндү түзөт. Балдар мектепке 10-майда кайтып келишет.

Биринчи класстын окуучулары үчүн каникулга кошумча эки жума, экинчи класстын окуучулары үчүн бир жума берилет. Кошумча каникулдардын мөөнөтүн райондук жана шаардык билим берүү башкармалыктары аймактын климаттык, санитардык-эпидемиологиялык шарттарын эске алуу менен аныктайт.

Жайкы каникулду эсепке албаганда, окуу жылынын узактыгы биринчи класста 32 жума, экинчи класста 33 жума, 3–11-класстарда 34 жума болот.

Бекитилген окуу пландарына ылайык, өлкөдө өтө турган ири мамлекеттик жана эл аралык иш-чараларга байланыштуу республикадагы бардык жалпы билим берүү уюмдарында 2026–2027-окуу жылы 2026-жылдын 15-сентябрында башталып, 2027-жылдын 25-майында аяктайт.