Акыркы беш жылдын ичинде электр энергиясын керектөө 25%дан ашык өстү. 2020-жылы ал 15,4 миллиард киловатт-саатты түзсө, 2025-жылдын аягына карата 19,3 миллиард деп катталган. Мындай маалыматтар КР президентинин өзгөчө тапшырмалар боюнча атайын өкүлү Бакыт Төрөбаевдин төрагалыгы астында өткөн энергетика тармагындагы инвесторлордун, өнөктөштөрдүн жана мамлекеттик органдардын жетекчилеринин катышуусундагы кеңешмеде айтылды.

Министрлер кабинетинин басма сөз кызматынын маалыматы боюнча, жолугушуунун негизги темасы буга чейин Министрлер кабинети тарабынан жактырылган энергетика тармагындагы инвестициялык макулдашууларды ишке ашыруунун жүрүшү болду.

Катышуучулар учурдагы долбоорлорду, анын ичинде күн, шамал жана гидроэлектр станцияларын курууну, ошондой эле орун алган көйгөйлөрдү жана аларды ишке ашырууну тездетүү мүмкүнчүлүктөрүн талкуулашты.

Суроо-талаптын өсүшү электр энергиясын иштеп чыгуучу жаңы кубаттуулуктарды ишке киргизүү темпинен ашып түшүп жатканы, бул өлкөнүн энергетикалык системасына келген жүктү арттырары белгиленди.

Төрөбаевдин айтымында, электр энергиясына болгон суроо-талап өсүп жаткан шартта, мамлекет тармактык органдардын ыйгарым укуктарын кеңейтип, инвестициялык долбоорлорду ишке ашыруу жол-жоболорун тездетти.

Ошол эле учурда ал инвесторлордун бир бөлүгү өз милдеттенмелерин натыйжалуу аткарып жатканын, ал эми айрым компаниялар тарабынан кечигүүлөр тармактын өнүгүшүнө тоскоол болуп жатканын белгиледи.

«Эгерде өсүштүн учурдагы темпи сакталса, 2030-жылга чейин Кыргызстанда электр энергиясын керектөө 25 миллиард киловатт-саатка жетиши мүмкүн. Буга байланыштуу мамлекеттин алдында электр энергиясынын тартыштыгын азайтуу жана энергетика тармагынын туруктуу өнүгүүсүн камсыз кылуу милдети турат», — деп баса белгиледи Төрөбаев.

Кеңешменин жыйынтыгында мамлекеттик органдарга аныкталган көйгөйлөрдү чечүүгө жана долбоорлорду ишке ашырууну тездетүүгө багытталган протоколдук тапшырмалар берилди, деп айтылат маалыматта.

Бийлик өкүлдөрү ошондой эле энергетика тармагында инвесторлор менен мындан ары да кызматташууга даяр экенин ырасташты.