Кыргызстандын Курулуш министрлиги көп батирлүү үйлөрдүн курулушун жылдап бүтүрө албай жаткан компанияларга тышкы башкаруу киргизүү маселесин кароого ниеттенүүдө. Мындан тышкары, мекеме аталган компаниялардын жетекчилерине жана уюштуруучуларына карата чара көрүү үчүн укук коргоо органдарына кайрылууну пландап жатат.

Бул тууралуу 31-октябрда министр Нурдан Орунтаев жүргүзгөн текшерүүнүн жыйынтыгы боюнча Курулуш министрлигинин басма сөз кызматы билдирди.

Мекеме башчысы Бишкек шаарындагы жана анын тегерегиндеги алты көйгөйлүү турак жай объектисин кыдырып, үлүшчүлөр менен жолугушту. Айрым үйлөрдүн курулушу 2013-жылдан бери бүтпөй келет.

Министр кайсы объектилерди текшерди:

• Жибек Жолу проспектиси, 295 жана 297. 80 батирлүү турак үй. Курулуш 2018-жылы башталган. Куруучу — «Эксперт Строй» ЖЧКсы.

• Мичурин көчөсү, 121б. Курулушу 2021-жылы башталган 169 батирлүү 9 кабаттуу үй. Куруучулар — «Эксперт Строй» ЖЧКсы жана «Гидротехстрой» ЖЧКсы.

• «Көк-Жар» конушу, Куйручук көчөсү, 197/2. 200 батирлүү 15 кабаттуу үй. Курулуш 2022-жылы башталган. Куруучулар — «Эмаком» ЖЧКсы жана «Ханстрой» ЖЧКсы.

• «Көк-Жар» конушу, Молдокулов көчөсү. Курулушу 2013-жылы эле башталган 360 батирлүү турак жай комплекси. Куруучулар — «Кыргыз-Арабиан Альхнейзи» ЖЧКсы жана «ОППС Строй» ЖЧКсы.

• Таш-Дөбө айылы, Куттубаев көчөсү, 15/9а, 15/9б жана 15/10. Курулушу 2020-жылы башталган 10 кабаттуу турак үйлөр. Куруучулар — «Эмаком» ЖЧКсы, «Ханстрой» ЖЧКсы жана «Бренд Хаус» ЖЧКсы.

• Кипкалов көчөсү. 181 батирлүү турак жай комплекси. Курулуш 2021-жылы башталган. Куруучулар — «Эмаком» ЖЧКсы, «Ханстрой» ЖЧКсы жана «Бренд Хаус» ЖЧКсы.

Батирлердин саны көрсөтүлгөн беш объектиде жалпысынан 990 батир каралган. Ошол эле учурда айрым үйлөрдүн курулушу он жылдан ашык убакыттан бери аягына чыга элек.

Курулуш министрлиги кандай чараларды көрүүнү пландап жатат

Мекеменин маалыматы боюнча, курулуштун токтоп калышынын негизги себептери — куруучулардын каржылык кыйынчылыктары, үлүшчүлөрдүн алдындагы милдеттенмелердин аткарылбашы жана мыйзам бузуулар.

Жакынкы арада Курулуш министрлиги көйгөйлүү курулуш компанияларына тышкы башкаруу киргизүү мүмкүнчүлүгүн карап чыгуу ниетинде. Ошондой эле алардын жетекчилери менен уюштуруучуларына чара көрүү үчүн материалдарды укук коргоо органдарына жөнөтүү пландалууда. Текшерүүнүн жыйынтыгында Нурдан Орунтаев Жибек Жолу проспектисиндеги 295 жана 297 даректери боюнча объектилерге керектүү документтерди даярдоону тездетүүнү тапшырды.

Ал эми курулуп бүтө элек калган үйлөрдү Курулуш министрлигинин карамагына өткөрүп берүү мүмкүнчүлүгү каралууда.

Мекеме чечим кабыл алууда үлүшчүлөрдүн укуктары менен кызыкчылыктарын сөзсүз эске алуу керектигин баса белгиледи. Жарандар өздөрү сунушталган варианттарды талкуулап, бирдиктүү позицияны иштеп чыгууга ниеттенип жатышканын билдиришти.