Кыргызстандын Суу ресурстары, айыл чарба жана кайра иштетүү өнөр жайы министрлигинин кызматкерлери 2026-жылдын 18–31-октябрында Түштүк Кореяда Smart Farm «акылдуу» айыл чарба технологиялары боюнча окуудан өтүштү. Бул тууралуу министрликтин басма сөз кызматы билдирди.

Эки жумалык курс Кореянын Эл аралык кызматташтык агенттигинин (KOICA) чакыруусу менен «Кыргыз Республикасында айыл чарба өндүрүмдүүлүгүн жогорулатуу жана кошумча нарк чынжырчасын өнүктүрүү үчүн потенциалды жогорулатуу (2026–2028)» программасынын алкагында өткөрүлдү. Аны KOICA жана Чолла-Пукто провинциясынын Эл аралык кызматташтык агенттиги (Jeonbuk International Cooperation Agency) уюштурду. Курстун максаты — өлкөнүн агрардык тармагын модернизациялоо үчүн алдыңкы технологияларды, санариптештирүүнү жана Smart Farm принциптерин киргизүү.

Катышуучулар кореялык эксперттердин жана профессорлордун лекцияларын угушту. Алардын арасында Smart Farm үлгүсүндө айыл чарбасындагы кошумча нарк чынжырчасынын атаандаштыкка жөндөмдүүлүгүн жогорулатуу саясаты жана тажрыйбасы боюнча семинарлар да болду. Делегация Кореядагы жогорку технологиялуу күнөскана комплекстерине, кайра иштетүү ишканаларына жана логистикалык борборлорго барып, климатты көзөмөлдөө, продукцияны сорттоо жана сапатын текшерүү процесстерин автоматташтыруу менен таанышты. Алардын катарында Кимдже инновациялык өрөөнүндөгү акылдуу ферма, Ванджу округундагы коомдук тамактанууну колдоо борбору жана азык-түлүк коопсуздугун сертификациялоо боюнча Корея институту (HACCP) бар. Анын стандарттарын Кыргызстанга ылайыкташтыруу маселеси да талкууланды.

Жыйынтыктоочу семинарларда министрликтин кызматкерлери стратегиялык пландарды иштеп чыгып, жеткирүү чынжырчаларын оптималдаштыруу боюнча долбоорлорун сунушташты. Алар кореялык тажрыйбаны кийин Кыргызстандын аймактарына ылайыкташтырууну көздөшөт. Делегация ошондой эле «2026 MY Jeonbuk One World Festival» дүйнөлүк фестивалына катышып, анда улуттук маданияттын элементтерин, анын ичинде ак калпакты тааныштырды. Программа аяктагандан кийин катышуучуларга KOICA жана CIAT институтунун сертификаттары тапшырылды.

Министрликтин маалыматына караганда, алынган билимди айыл чарбасын санариптештирүү, түшүмдүүлүктү жогорулатуу жана агрардык продукцияны ички жана тышкы рыноктордо сатуу чынжырчаларын түзүү боюнча жаңы долбоорлордо колдонуу пландалууда.