2025-жылы Кыргыз Республикасынын экономикасында 30,7 миң ишкана финансылык-чарбалык ишмердүүлүк жүргүзгөн. Бул тууралуу Улуттук статистика комитети «Кыргыз Республикасынын ишканаларынын каржысы: 2021–2025» аттуу басылмасында билдирди.

Жыл жыйынтыгы боюнча экономикадагы ишканалар 430,5 млрд сом өлчөмүндө оң сальдолоштурулган каржылык жыйынтыкка (таза пайдага) ээ болушту — бул мурунку жылга салыштырмалуу 42,8%га көп. Рентабелдүү (кирешелүү) ишканалардын үлүшү 43%ды, ал эми чыгашалуу иштегендердики 20,4%ды түздү.

Пайданын негизги көлөмүн реалдуу сектордун уюмдары алышты — 325,4 млрд сом же жалпы сумманын 75,6%ы. Каржы секторуна 105,2 млрд сом же 24,4% туура келди.

2025-жылы экономикадагы ишканалардын жалпы кирешеси (дүң кирешеси) 2 283,9 млрд сомду түзүп, 2024-жылга салыштырмалуу 62%га өстү. Бул көлөмдүн 89%дык үлүшү реалдуу секторго, ал эми 11%ы каржы секторуна туура келди. Кирешеге негизги салымды кайра иштетүү өнөр жайы, каржылык ортомчулук жана камсыздандыруу, дүң жана чекене соода, курулуш, кен казуу жана энергия менен камсыздоо ишканалары кошту.

Тармактык түзүмдө өлкөдөгү ишканалардын эң көп үлүшү соодага туура келет — жалпы сандын 32,5%ы, андан ары өнөр жай (13%), курулуш (10,7%) жана кесиптик, илимий жана техникалык ишмердүүлүк (8,3%) турат. 2025-жылы өлкөнүн бардык аймактарындагы ишканалар оң каржылык жыйынтыкка жетишти.