Пекин шаарында нөшөрлөгөн жаандан кийин жүргөн сел 30 адамдын өмүрүн алды. Бул тууралуу РИА Новости жазды.

Маалыматка ылайык, 24-июлдан бери жааган катуу жамгыр Чаобай дарыясынын деңгээлин көтөрүп, Миюнь суу сактагычы соңку 60 жылдагы эң жогорку көлөмгө жетти. Натыйжада Миюнь, Хуайжоу жана Фаншань райондорунан 80 332 киши коопсуз аймактарга эвакуацияланды.

Кытай өкмөтү кырдаалды калыбына келтирүү үчүн 200 миллион юань (27,8 миллион доллар) бөлгөн.

Белгилей кетсек, 2023-жылы да Пекинде нөшөрлүү жаандан улам 11 киши каза болуп, 44 миңден ашуун адам жабыркаган болчу.