Вьетнамдык белгилүү модель жана эл аралык фэшн-инфлюенсер Куинь Ань Шин (Quỳnh Anh Shyn) Кыргызстанга эс алууга келип, социалдык тармактарда өлкөнүн жаратылышынан алган таасирлери менен бөлүштү.

Өзүнүн баракчасына ал өлкө боюнча саякатынан тартылган сүрөттөрдү жарыялап, бул жакка келүү чечимин социалдык тармактардан кокустан кыска видео көрүп калгандан кийин кабыл алганын айтып берди.

«Бир ирет мен бул укмуштуудай өлкө тууралуу кыска видеону (reels) кокустан көрүп калып, дароо эле саякаттоону пландап, "ушул жерде жана азыр" барууну чечтим! Мен бул ажайып, кол тийбеген таза жаратылышка жана өзгөчө атмосферага толугу менен ашык болдум», — деп жазган ал.

Кыргызстан менен таанышкан соң, Куинь Ань Шин Дүйнөлүк көчмөндөр оюндарына күбө болуу үчүн өлкөдө узагыраак калуу же кайрадан келүү мүмкүнчүлүгүн караштырып жатканын билдирди.

Куинь Ань Шин модель, фэшн-инфлюенсер жана ишкер айым катары белгилүү. Ал 2019-жылдан бери Париж, Милан жана Лондондогу мода жумалыктарынын алкагындагы көрсөтүүлөргө катышып келет. Ошондой эле Louis Vuitton, Fendi, Dior, Chanel жана Loewe сыяктуу дүйнөгө таанымал мода үйлөрү менен кызматташат.

VI Дүйнөлүк көчмөндөр оюндары Кыргызстанда 2026-жылдын 31-августунан 6-сентябрына чейин өтөт.

Reporter.kg — VI Дүйнөлүк көчмөндөр оюндарынын маалыматтык өнөктөшү.