Өкмөт Кыргызстандын аймагында ломбарддардын ишин уюштурууга карата минималдуу талаптардын жобосун бекитти. Тиешелүү токтомго Министрлер кабинетинин төрагасы Адылбек Касымалиев кол койду.

Бул документ өлкөнүн аймагында ломбард ишин жүзөгө ашырууга лицензиясы бар бардык юридикалык жактардын ишмердүүлүгүн жөнгө салат.

Токтом менен ломбарддардын уставдык капиталынын минималдуу өлчөмү этап-этабы менен төмөнкүдөй белгиленди:

• 2025-жылдын 1-январынан тартып — 3 млн сомдон кем эмес;
• 2026-жылдын 1-июлунан тартып — 7 млн сомдон кем эмес;
• 2027-жылдын 1-июлунан тартып — 14 млн сомдон кем эмес;
• 2028-жылдын 1-июлунан тартып — 20 млн сомдон кем эмес.

Ломбард ишинин субъекттери алты айлык мөөнөттө өз ишмердүүлүгүн жаңы бекитилген жобонун талаптарына ылайык келтириши керек.

Токтом расмий жарыяланган күндөн тартып он беш күн өткөндөн кийин күчүнө кирет.