Ош электр тармактары ишканасынын кампасынан электр зымдарын мыйзамсыз сатууга шектелип, кампа башчысы кармалды. Бул тууралуу Улуттук коопсуздук мамлекеттик комитетинин басма сөз кызматы билдирди.

Атайын кызматтын маалыматында, борбордук кампанын башчысы М.А.М. электр берүү линияларын оңдоо жана пайдалануу үчүн арналган АС-95, АС-185 жана АС-300 маркасындагы алюминий зымдарын сатып келген.

Аталган аракеттердин натыйжасында ишканага материалдык чыгым келтирилген. УКМК кампадагы запастардын жетишсиздиги Ош облусунун энергетикалык инфраструктурасын 2026–2027-жылдардын күз-кыш мезгилине даярдоо боюнча оңдоо иштерин өз убагында жүргүзүүгө тобокелдиктерди жаратканын билдирди.

Учурда уурдоонун кошумча фактыларын жана бул ишке тиешеси бар башка адамдарды аныктоо боюнча тергөө-ыкчам иштери жүрүп жатканы айтылды.