Ош шаарында спорттук мелдештерди жана маданий программаларды өткөрүүгө боло турган «Жаштык Арена» спорттук-оюн-зоок комплексин куруу пландалууда. Бул тууралуу шаар мэри Жанарбек Акаев «Кыялымдагы Кыргызстан: Ош-2026» форумунун жабылыш аземинде билдирди.

Мэриянын маалыматына ылайык, комплекс Кызыл-Кыштак айылдык аймактык башкармалыгынын аймагында салынат жана 5 миң 200гө чейин көрүүчүнү кабыл алууга ылайыкташтырылат. Жайда муз аянтчасы, хоккей жана күрөш боюнча мелдештер өтүүчү спорттук тилкелер, концерттик жана маданий иш-чараларга арналган жайлар, ошондой эле соода жана тамактануу түйүндөрү орун алат.

Курулуш иштерин 2027-жылдын март айында баштап, 2030-жылдын март айында аяктоо пландалып жатканы маалымдалды.