Ош шаарында көп кабаттуу турак үйлөрдүн сырткы көрүнүшүн жаңылоо иштери жүрүүдө. Планга ылайык, быйыл 70 көп кабаттуу үйдүн фасадын актоо жана сырдоо каралган. Бул тууралуу Ош мэриясы билдирди.

Маалыматка ылайык, учурда Н. Исанов көчөсүндө жайгашкан 51-көп кабаттуу үйдүн чатыры алмаштырылып жатат. Ал эми Раззаков көчөсү боюнча 26-көп кабаттуу турак үйдүн сырткы бөлүгү сырдалууда.

Шаар бийлиги тургундарга кайрылып, эгер жашаган үйлөрү эскирип, жаңылоого муктаж болсо, мэрияга же тиешелүү ишканага кайрылып, кош каржылоо программасы аркылуу фасадды жаңылоого мүмкүнчүлүк бар экенин эске салды.