Президент Садыр Жапаровдун жакынынын атын жамынып 500 миң доллар алган деген шек менен «Памир Строй» курулуш компаниясынын ээси кармалды. Бул тууралуу Улуттук коопсуздук мамлекеттик комитети (УКМК) кабарлады.

Маалыматка ылайык, ал жаран 2023-жылы башка бирөөнүн жер тилкесине үлүштүк негизде көп кабаттуу үй курууну макулдашкан. Бирок жер тилкенин бир бөлүгү мамлекетке өтүп калган. Андан соң шектүү бул маселени өлкө башчынын жакыны аркылуу чечип берем деп, жабырлануучудан 500 миң доллар алган.

УКМК шектүүнүн алдамчылык менен акча алганын тастыктап, аны камакка алганын билдирди.

Учурда окуяга байланыштуу башка адамдарды аныктоо үчүн кошумча тергөө иштери уланууда.