Суу ресурстары, айыл чарба жана кайра иштетүү өнөр жайы министрлиги башка мамлекеттик органдар менен биргеликте ишкерлердин уруксат берүүчү документтерди алууга байланышкан көйгөйлөрүн карап чыгып, жол-жоболорду жөнөкөйлөтүү боюнча сунуштарды иштеп чыгат. Бул тууралуу министрдин орун басары Дүйшеевдин кайра иштетүү тармагынын өкүлдөрү, ишкерлер жана ассоциациялардын жетекчилери менен болгон жолугушуусунда макулдашылды.

Жолугушуу президенттин 2026-жылдын 16-апрелиндеги №144 «Уруксат берүүчү документтер чөйрөсүндөгү жөнгө салуучу гильотина жөнүндө» жарлыгынын алкагында өттү. Ишкерлер жана ассоциациялардын өкүлдөрү уруксаттарды алууда, жол-жоболордон өтүүдө жана өндүрүштүк ишмердүүлүктү жүргүзүүдө кездешкен кыйынчылыктар тууралуу айтып беришти.

Катышуучулар бул көйгөйлөрдү чечүү, административдик тоскоолдуктарды азайтуу жана уруксат берүүчү жол-жоболорду жөнөкөйлөтүү жолдорун талкуулашты. Жолугушуунун жыйынтыгында мындан аркы чаралар аныкталды: көтөрүлгөн маселелер тиешелүү мамлекеттик органдар менен биргеликте каралып, андан кийин жол-жоболорду оптималдаштыруу жана жөнөкөйлөтүү боюнча конкреттүү сунуштар иштелип чыгат.