Министрлер кабинетинин төрагасы Адылбек Касымалиев 7-октябрда өткөн аппараттык жыйында жерлерди трансформациялоого мамлекеттик көзөмөл жүргүзүү маселесин көтөрдү. Анын айтымында, республиканын райондорунда 67 миң гектардан ашык жер трансформацияланган, анын ичинен 24 миң гектар жер толук пайдаланылбай жатат. Ал тиешелүү органдарга трансформацияланган ар бир жер тилкесин санариптик эсепке алууну камсыз кылууну, жер саясатын катуу көзөмөлгө алууну жана трансформацияланган жерлерди толук инвентаризациялоону тапшырды.

Мындан тышкары, жыйында бюджеттин аткарылышы талкууланды. 2026-жылдын тогуз айынын жыйынтыгы боюнча республикалык бюджеттин кирешеси 608,1 млрд сомду түздү. Бул пландан 22,7 млрд сомго көп болуп, план 103,9%га аткарылды. Салык кызматы 259,8 млрд сом чогултту, план 103,6%га аткарылды. Бажы кызматы 139 млрд сом чогултуп, планды 104,6%га аткарды. Министрлер кабинетинин төрагасы белгилегендей, жыл аягына чейин оң динамиканы сактап, каражаттарды өз убагында өздөштүрүүнү камсыз кылуу зарыл.

Касымалиев ошондой эле Moody’s агенттигинин Кыргызстандын рейтингин B3төн B2ге көтөрүп, «туруктуу» болжол бергенин экономикалык жана финансылык саясаттын маанилүү баасы деп атады. Анын айтымында, агенттик экономиканын туруктуу өсүшүн жана диверсификацияланышын, киши башына эсептегендеги ИДПнын көбөйүшүн, ири инфраструктуралык инвестицияларды, мамлекеттик финансынын бекемделишин жана мамлекеттик карыздын ИДПга карата азайышын белгилеген. Бул эл аралык инвесторлордун ишенимин бекемдеп, узак мөөнөттүү каржылоону тартуу мүмкүнчүлүктөрүн кеңейтет.

Түз чет элдик инвестициялардын агымы биринчи жарым жылдыкта 709,9 млн долларды түзүп, өткөн жылдын ушул мезгилине салыштырмалуу 26,2%га өстү. Инвестициялар кайра иштетүү өнөр жайында 21,3%га, пайдалуу кендерди казып алууда 7,1%га, соодада 57,6%га, финансылык ортомчулук жана камсыздандыруу тармагында 5,9%га, кесиптик, илимий жана техникалык ишмердикте 17,7%га, маалымат жана байланыш тармагында 19,5%га өскөн. Инвестициялар боюнча улуттук агенттикке инвестиция тартуу боюнча ишти күчөтүү тапшырылды.

Туризм тармагында январь–июнь айларында эс алган адамдардын саны дээрлик 1,4 эсеге көбөйүп, 1,9 млн адамга жетти. Алдын ала эсептөөлөр боюнча, тармактын кошумча наркы 34,1 млрд сомду түзүп, 26,7%га өскөн. Касымалиев чет элдик туристтерди көбүрөөк тартууну, алардын өлкөдө болуу мөөнөтүн узартууну, кызмат көрсөтүүлөрдүн сапатын жогорулатууну жана инфраструктураны өнүктүрүүнү тапшырды. Ошондой эле туристтердин коопсуздугуна, кышкы сезонго даярдыкка, жолдордун абалына жана кышкы туризмди чет өлкөлөрдө илгерилетүүгө көңүл буруу зарылдыгын белгиледи.