Кыргызстандын президенти Садыр Жапаров Борбордук Азия жана Азербайжандын бирдиктүү электрондук соода аянтчасын түзүүнү сунуштады. Ал бул демилгени 8-октябрда Түркмөнбашы шаарында өтүп жаткан Борбордук Азия жана Азербайжан мамлекет башчыларынын сегизинчи Консультативдик жолугушуусунда көтөрдү.

Мамлекет башчысынын пикиринде, жалпы онлайн аянтча ишкерлерге соода рынокторун кеңейтүүгө, ал эми керектөөчүлөргө аймактын өлкөлөрүндө өндүрүлгөн товарларга кеңири жеткиликтүүлүктү камсыз кылууга мүмкүндүк берет.

Жапаров электрондук сооданы өнүктүрүү тиешелүү логистикалык инфраструктураны түзүү менен коштолушу керектигин баса белгиледи. Сөз жеткирүү, кампада сактоо, бажылык тариздөө жана товарларга көз салуу системасын уюштуруу тууралуу болуп жатат.

Кыргызстан бул демилгени ишке ашырууга Жогорку технологиялар паркынын адистерин тартууга даяр.

Кызматташтыктын дагы бир багыты катары Жапаров өнөр жай кооперациясын атады. Ал өлкөлөрдүн өкмөттөрүнө айыл чарба продукциясын кайра иштетүү, жеңил өнөр жай, курулуш материалдарын өндүрүү жана логистика тармагында конкреттүү биргелешкен долбоорлорду аныктоону сунуштады.

Мында ар бир долбоор үчүн катышуучуларды, каржылоо булактарын жана ишке ашыруу мөөнөттөрүн алдын ала тактоо зарыл.

Өлкө башчысы транспорттук каттамдарды өнүктүрүүгө өзгөчө көңүл бурду. Анын айтымында, аймактык кызматташтыктын натыйжалуулугу ташуулардын наркынан, транспорттук байланыштардын ишенимдүүлүгүнөн жана транзиттик шарттардын алдын ала божомолдонушунан түздөн-түз көз каранды.

Бул контекстте президент «Кытай — Кыргызстан — Өзбекстан» темир жолунун курулушунун маанисин белгиледи. Бул долбоор аймак өлкөлөрүнүн эл аралык транспорттук жана өндүрүштүк чынжырчаларга катышуусун кеңейтүүгө жол ачат.

«Биздин багытыбыз өлчөнө турган натыйжалар болушу керек: жеткирүү баасын арзандатуу жана жол жүрүү убактысын кыскартуу. Ошол эле учурда ар бир өлкө аймактык транспорттук долбоорлорго толук кандуу катышууга жана алардан экономикалык пайда алууга мүмкүнчүлүк алышы зарыл», — деп баса белгиледи Жапаров.

Мамлекет башчысы ошондой эле Борбордук Азия жана Азербайжандын жалпы туристтик мейкиндигин өнүктүрүүнү сунуштады.

Анын айтымында, тарыхый шаарлар, тоо жана Каспий боюндагы каттамдар, ошондой эле өлкөлөрдүн маданий мурастары регионду бирдиктүү туристтик багыт катары илгерилетүүгө мүмкүндүк берет.

Жапаров туристтер бир сапардын алкагында бир эле учурда бир нече мамлекетти кыдыра алышы үчүн «бир саякат — бир нече өлкө» принциби боюнча кызматташтыкты өнүктүрүүнү сунуштады.

Мындан тышкары, президент мөңгүлөрдү жана тоо экосистемаларын сактоо зарылдыгына көңүл бурду. Ал аймактын туруктуу өнүгүүсү үчүн жаратылыш ресурстарын сарамжалдуу пайдалануунун жана инновациялык чечимдерди киргизүүнүн маанилүүлүгүн белгиледи.

Сөзүнүн соңунда Жапаров экономикалык байланыштарды чыңдоо жана элдин бакубаттуулугун жогорулатуу максатында Кыргызстан Борбордук Азия өлкөлөрү жана Азербайжан менен кызматташууну мындан ары да бекемдөөгө даяр экендигин билдирди.